Cortapega, o microfestival de música electrónica que organiza Desconcierto Cultural, contará cunha nova edición o próximo 25 de novembro. Como nas ocasións anteriores, o festival terá lugar na sede da Fundación SGAE de Santiago de Compostela, e rematará cunha afterparty na sala Lusco e Fusco. Con esta terceira entrega en menos dun ano, Cortapega consolídase como unha das apostas máis firmes pola música electrónica en Galicia.

Desde Desconcierto Cultural, preténdese amosar a riqueza que atesouran nesta escena cada vez máis artistas galegos e, ao mesmo tempo, dar cabida a algunhas das propostas máis arriscadas e innovadoras do panorama nacional e internacional. A idea básica é revelar a heteroxeneidade dunha escena fértil, en constante revisión e transformación.

Artistas

Sunny Graves (Live)

Sunny Graves (Live)

Sunny Graves é o alter ego de Simon Williams, un músico electrónico con raíces anglo-latinas que reside en Barcelona. Na Fundación SGAE presentará “Erosion EP”, un traballo no que densas capas de sintetizadores, ritmos pulsantes e intensos graves constrúen personalísimas paisaxes sonoras. Cabe destacar, ademais da súa xira xunto a James Holden, os seus directos e A/V shows en Sónar 2014, Primavera Sound 2015 e LEV 2016.

Pantis (Live)

Pantis (Live)

Pantis é o proxecto en solitario do grovense Rubén Domínguez, axitador da escena musical galega desde diversas frontes: foi membro de Telephones Rouges, é compoñente de Chicharrón e codirixe o excelente colectivo artístico Prenom. A súa música é debedora do krautrock, do synth e da protoelectrónica máis vangardista. As súas actuacións discorren entre o arrebato de “Xinxa” e a escuridade do dance-pop de “Viaduto”, dúas das súas mellores composicións.

Pálida (Live)

Pálida (Live)

Pálida é o proxecto persoal do vigués José Garnelo (Nelo). A súa música é alquimia posmoderna: noise rock, minimal techno, dark ambient ou microhouse fúndense nunhas composicións hedonistas cargadas de enerxía. Con cada novo traballo, Pálida revela unha nova aresta da súa personalidade poliédrica. En “Wonders”, canción do seu último lanzamento, experimenta co dream pop con excelentes resultados. Os seus directos, unha treboada.

BassBoss (Live)

BassBoss (Live)

BassBoss foi sen dúbida unha das sorpresas agradables do último LEV, aínda que tamén o poderiamos ter descuberto soando nunha prestixiosa radio inglesa de BassMusic. Con Boards of Canada, o Burial de “UK” ou o ton lóbrego de Holy Other no retrovisor, o xove produtor asturiano construíu “XII” (2015), un compendio das súas virtudes que explica e xustifica en só dous cortes a atención que recibe na actualidade a escena electrónica asturiana.

Diskoan (Dj)

Diskoan (Dj)

Mentres que o koan, un exercicio zen, persegue desligarse da razón e aumentar o nivel de consciencia, unha sesión de Diskoan desliga do pensamento para trasladarte á inconsciencia. O madrileño entrelaza xéneros totalmente dispares ata conducirte ao baile máis primitivo. Proba diso, son as súas residencias e actuacións en recoñecidas salas nacionais. Forma parte de A MAL GAM A, unha nova célula creativa que pretende revolucionar o concepto de clube en Madrid.

Música

Entradas